दिवाळीआधी सरकारी कर्मचाऱ्यांसाठी आनंदाची बातमी ! या कर्मचाऱ्यांना ऑक्टोबर महिन्याच्या पगारांसोबत मिळणार आर्थिक लाभ
7th Pay Commission : दिवाळीच्या पार्श्वभूमीवर सरकारी कर्मचाऱ्यांसाठी चांगली बातमी समोर आली आहे. सणासुदीच्या काळात कर्मचाऱ्यांना दिलासा देणारे काही महत्त्वाचे निर्णय सरकारकडून घेण्यात आले आहेत. काही दिवसांपूर्वीच एसटी महामंडळाने आपल्या कर्मचाऱ्यांना दिवाळी बोनस देण्याची घोषणा केली होती, तर रेल्वे कर्मचाऱ्यांनाही बोनस देण्यात आला होता.
याशिवाय, राज्य शासनाकडून दिवाळीपूर्वीच ऑक्टोबर महिन्याचे वेतन वितरित करण्याबाबतचा प्रस्ताव विचाराधीन असल्याचे समोर आले आहे. या पार्श्वभूमीवर मुंबई महानगरपालिकेने (BMC) आपल्या कर्मचाऱ्यांना दिवाळी बोनस म्हणून तब्बल ₹31,000 देण्याचा निर्णय घेतला आहे. मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांच्या मार्गदर्शनाखाली बीएमसी आयुक्तांनी यासंदर्भातील आदेश जारी केला असून, कर्मचाऱ्यांमध्ये आनंदाचे वातावरण निर्माण झाले आहे.
दरम्यान, आता केंद्रीय कर्मचाऱ्यांसाठीदेखील एक मोठी आणि आनंददायी बातमी समोर आली आहे. भारतीय डाक विभाग (India Post) यांनी आपल्या कर्मचाऱ्यांसाठी बोनस जाहीर केला आहे. नुकताच जारी करण्यात आलेल्या आदेशानुसार, डाक विभागातील कर्मचाऱ्यांना 60 दिवसांचा पगार बोनस म्हणून देण्यात येणार आहे.
हा बोनस उत्पादकता-संबंधित बोनस (Productivity Linked Bonus – PLB) म्हणून दिला जाणार असून, याचा लाभ विभागातील ग्रुप-सी कर्मचारी, मल्टी टास्किंग स्टाफ (MTS), अराजपत्रित ग्रुप-बी, ग्रामीण डाक सेवक (GDS) तसेच पूर्णवेळ काम करणारे कॉन्ट्रॅक्ट कर्मचारी यांना मिळणार आहे.
विशेष म्हणजे, 31 मार्च 2025 नंतर निवृत्त झालेले किंवा राजीनामा दिलेले कर्मचारी सुद्धा या बोनससाठी पात्र राहतील. तसेच डाक विभागाच्या बाहेर प्रतिनियुक्तीवर कार्यरत असणाऱ्या कर्मचाऱ्यांनाही या बोनसचा लाभ मिळणार आहे.
या बोनसची रक्कम एवरेज वेतन × 60 दिन ÷ 30.41 या सूत्रावर आधारित असेल. कर्मचाऱ्यांना ₹7,000 प्रति महिना एवरेज पगार गृहीत धरून बोनसची गणना करण्यात येईल. तर कॉन्ट्रॅक्टवर कार्यरत कर्मचाऱ्यांसाठी ₹1,200 काल्पनिक पगार गृहीत धरून बोनस दिला जाणार आहे.
या निर्णयामुळे हजारो डाक कर्मचाऱ्यांना लाभ होणार असून, सणासुदीच्या काळात त्यांच्या हातात अतिरिक्त आर्थिक लाभ मिळणार आहे. डाक विभागाच्या या निर्णयाचे स्वागत संपूर्ण देशभरातील कर्मचाऱ्यांनी आनंदाने केले आहे.