मुख्यमंत्री माझी लाडकी बहीण योजना सध्या महाराष्ट्रात विधानसभा निवडणुकीच्या आचारसंहितेमुळे तात्पुरती स्थगित करण्यात आली आहे. निवडणूक आयोगाने, आचारसंहितेच्या काळात मतदारांवर थेट प्रभाव पडू शकेल अशा आर्थिक योजनांना थांबवण्याचा निर्णय घेतला आहे. त्यानुसार, महिला व बालविकास विभागाने या योजनेसाठी निधी तात्पुरता थांबवला आहे. त्यामुळे विधानसभा निवडणुका पूर्ण होईपर्यंत लाभार्थी महिलांना योजनेचा लाभ मिळणार नाही.
अद्याप ऑक्टोबर आणि नोव्हेंबर महिन्यांसाठी योजनेअंतर्गत पात्र लाभार्थ्यांना एकत्रित 3,000 रुपये दिले गेले आहेत. योजनेच्या स्थगितीबाबत अफवा पसरल्यानंतर, महिला व बालविकास मंत्री अदिती तटकरे यांनी 19 ऑक्टोबर रोजी स्पष्ट केले की, मुख्यमंत्री माझी लाडकी बहीण योजना आचारसंहितेमुळे तात्पुरती स्थगित करण्यात आली असली तरी ती बंद होणार नाही. योजनेअंतर्गत पात्र महिलांना दर महिन्याला 1,500 रुपये त्यांच्या आधार लिंक असलेल्या बँक खात्यात जमा केले जात आहेत.
राज्य सरकारने जुलै, ऑगस्ट, सप्टेंबर, ऑक्टोबर आणि नोव्हेंबर महिन्यांचे एकत्रित 7,500 रुपये राज्यातील पात्र 2 कोटी 34 लाख महिलांच्या खात्यात जमा केले आहेत. सहावा हप्ता डिसेंबर महिन्यात देण्याचे नियोजन करण्यात आले असून, महिलांनी योजनेबद्दलच्या अफवांना बळी पडू नये असे आवाहन अदिती तटकरे यांनी केले आहे.
राज्याचे उपमुख्यमंत्री आणि अर्थमंत्री अजित पवार यांनीही याबाबत पोस्ट शेअर करत स्पष्ट केले की, मुख्यमंत्री माझी लाडकी बहीण योजना कुठल्याही परिस्थितीत बंद होणार नाही.
